Бүгүн саха балаҕаныгар Найахы народнай хоругар ыллаабыт, 6 оҕолоох ийэ, эбэ, сэрии кэмин оҕото Мария Гоголева туһунан «Ырыа куттаах Хоту дойду Күөрэгэйэ» кинигэ сүрэхтэниитэ бэрт тэрээһиннээхтик, олус истиҥник ааста. СВФУ преподавателэ Антонина Афанасьевна кинигэни билиһиннэрэн, ис сүрэҕиттэн ахтыыны оҥордо. Мария Егоровна бииргэ ыллаабыт-туойбут Дьокуускайтан кэлбит «Долгунча» ансаамбылын далбар хотуннара ахтыыларын, ырыаларын дуоһуйа иһиттибит, таҥастара маанытын, хотугулуу сиэдэрэйин сөхтүбүт, һээдьэлэһэн сэргэхсийдибит. Кыыһа Саргылана Ивановна кылгас кэм иһигэр ахтыылары хомуйан, 8 түһүмэхтээх, 70 экземплярынан таһаартабыт кинигэтэ ис-тас тутула тупсаҕайын, ахтыылар ис хоһооннорун ааҕааччы биһириэҕэ, сэргиэҕэ, Мария Егоровна олоҕун түгэннэриттэн хаартыскалары астына көрүөҕэ. Айылҕаттан бэриллибит ураты кэрэ куоластаах, олоҕун ырыанан киэргэппит ийэлэрин кэриэстээн, махтанан, оҕолоро кэнчээри ыччаттарыгар, бар дьонноругар үйэлээх дьоһун бэлэҕи оҥордулар. Тэрээһин кыттыылаахтара сырдык мичээрдээх, ылбаҕай ырыалаах Маайыспыт туһунан ахтыһан, ырыаларын истэн, дуоһуйдубут, дьоро күнү бэлэхтээбит ыалдьыттарга, оҕолорго махтанабыт.
Ветеран учуутал Светлана Петрова, Балыктаах с.
