Ахсынньы 14 күнүгэр Найахы сиригэр иис-уус маанылаах түһүлгэтэ буолан ааста.
2014 сыллаахха тэриллибит «Симэхтэр» иистэнньэҥнэр түмсүүлэрэ уон сыллаах үбүлүөйдээх күннэрэ үрдүк таһымҥа ааста.
Тэрээһин киэҥ ис хоһоонноох буолан кэлбит ыалдьыттары сөхтөрдө.
Кулууп дьиэтин сырдык фойета тобус толору Симэхтэр түбүктээх, сыралаах, ситиһиилээх үлэлэрин көрдөрөр быыстапканы салайааччы СӨ уус-ран оҥоһуктарын маастара Гоголева Х.И. , СӨ уус-ран оҥоһуктарын маастара Федорова М.И. арыйдылар, Чукрова Г.А. түмсүү үлэтин кэпсиир кинигэ сүрэхтэниитин дириҥник арыйан сырдатта.
Тэрээһин үөрүүлээх түгэнэ «Күбэйэ» үҥкүү бөлөҕө «Иис тойуга» үҥкүүтүнэн , оскуола нарын намчы кэрэ кыргыттара СӨ уус-уран оҥоьукка маастара Пестерева М.А. кылтан оҥоһуллубут симэхтэрин кэтэн, көрдөрөн хаамыыларынан арылынна.
«Симэхтэр» далбар хотуттара хаҥыылара кэҥээн 21 буолан үбүлүөйдээх күннэрин үөрэ-көтө көрүстүлэр , хас биирдии иистэнньэҥ махтал суруктарынан, бочуотунай грамоталарынан, үрдүк наҕараадаларынан чиэстэннилэр.
Үрдүк наҕараадаларынан салайааччы Гоголева Х.И. «Найахы нэһилиэгин бочуоттаах олохтооҕо» бочуоттаах знагынан, Чукрова Г.А. СӨ уус-уран оҥоһукка маастара, «Найахы нэһилиэгин бочуоттаах олохтооҕо» бочуоттаах знагынан, Пестерева М.А. СӨ култууратын уонна духуобунай сайдыы Өрөспүүбүлүкэтээҕи норуот айымньытын дьиэтин аатыттан
«СӨ норуот айымньытын сайдыытыгар кылаатын иһин» түөскэ кэтиллэр знагынан наҕараадаланнылар.
Үбүлүөйдээх үтүө күн үһүс чааһынан Симэхтэр айан, тигэн таһаарбыт таҥастарынан, оҥоһуктарынан кыттыылаах эҕэрдэ кэнсиэр көрөөччүнү астыннарда.
Кэнсиэргэ Дьокуускай куораттан ыалдьыттар, норуот маастардар Жиркова Л. П. салайааччылаах «Үктэл» общественнай түмсүү саха өбүгэ , аныгылыы истиллээх таҥастарын хааман көрдөрөн дьону-сэргэни сэргэхситтилэр.
«Чэлгийээнэ», «Долун» үҥкүү кэллэктииптэрэ, «Дьүрүскэн» хомусчуттар, «Найахыына» ырыа ансаамбылын кыргыттара, «Кэрэчээнэ Кур» Мурад студиятын кыра кырачаан кыргыттара, биирдиилээн талааннаах ырыаһыттар Евдокия Фомина, Афанасий Новоприезжай, Эдуард Марков, Иван Фомин уонна Амматтан кэлэн биир дойдулаахпыт, кыыспыт Степанида Пестерева-Антонова истиҥ ыраларынан киэргэттилэр.
