Кыайыы 79 сылын көрсө Найахы сирин Кыайыы болуоссатыгар нэһилиэк дьоно-сэргэтэ, ытык кырдьаҕастара, кэнчээри ыччата үгэскэ курдук өрөгөйдөөх күҥҥэ, миитиҥҥэ тоҕуоруһа муһуннулар.
1941, 1942 сылларга Аҕа Дойду сэриитигэр бэбиэскэ тутан, дойдуларын чиэһин көмүскүү барбыт биир дойдулаахтарын, аҕаларын, эһээлэрин кэриэстээн, чуумпуран, чиэстээхтик аҕыннылар, санаатылар.
Нэһилиэк үлэ, тыыл ветераннарыгар, сэрии оҕолоругар анаан элбэх махтал, эҕэрдэ тыллара ананнылар.
Миитин Кыайыы, Арассыыйа, Саха сирин былаахтарын ыччат уолаттар өрө тутан киириилэриттэн, Арассыыйа гииминэн, оскуола үөрэнээччилэрин хорунан өрө көтөҕүллүүлээхтик саҕаланна.
Алын кылаас үөрэнээччилэрин, «Уолан» уус-уран ааҕыы бөлөҕүн толоруллубут ис хоһоонноох хоһоонноро дьону-сэргэни долгутта.
«Көлүкэчээн», «Эрчим» үҥкүүһүттэрэ, » Айхаллан» ырыа ансаамбыла, Евдокия Фомина, Афанасий Новоприезжий бырааһынньыгы өссө киэргэттилэр, дьону астыннардылар.
Биир дойдулаахтарбытын өссө төгүл Улуу Кыайыы күнүнэн! Баар буоллун эйэ! Суох буоллун сэрии!













